Si Annabelle Rama mismo ang nagbalita sa PEP (Philippine Entertainment Portal) tungkol sa desisyon ng Department of Justice (DOJ) na ibasura ang kasong Reckless Imprudence Resulting in Homicide na isinampa ni Lorayne Pardo laban sa kanyang anak na si Richard Gutierrez.

Nalaman ng PEP ang balita nang dumating kaninang hapon, March 17, si Annabelle sa presscon ng Nokia para kay Ruffa Gutierrez sa Garden Ballroom ng Edsa Shangri-la Hotel.

Ayon kay Annabelle, ang legal counsel ni Richard ang nagparating sa kanya ng balita.

Tuwang-tuwa si Annabelle sa naging desisyon ng DOJ at halos hindi raw nakapagsalita si Richard nang tawagan niya sa telepono.

Mababa ang boses ni Annabelle nang sabihin nito na nagpapasalamat siya sa Diyos dahil isa-isa nang nasasagot ang kanyang mga dasal—ang pagkakasundo ng PEP at ng kanyang pamilya, ang pagkakaloob ng korte kay Ruffa ng sole custody ng dalawang anak nito, at ang pag-dismiss ng DOJ sa kaso ni Lorayne laban kay Richard.

Mismong si DOJ Secretary Agnes Devanadera ang pumirma sa five-page resolution na nagpapawalang-sala kay Richard.